|
GULBIENA TAL-MILIED
Meta jien tajt bidu għal ħajti, Hekk kif l-ilma madwari ħassejt, Kont ħerqana biex nara x-xemx t’Alla, Għalhekk dlonk ‘il fuq rasi għollejt.
Miegħi kelli minn ħuti bil-bosta, Ħdejn xulxin iffullati flimkien, Mimdudin fuq friex abjad tal-qoton, Nistennew b’herqa kbira l-qawmien.
Iżda x-xemx li tant xtaqt qatt ma rajtha, Għalkemm twalt, iġebbidt, iltewejt, Bdejt nisfar, anzi nsir lewn il-fidda, Fl-istess waqt sew ma’ huti trassejt.
Bħal kont naf, għaliex qalbi ħebritni, Li din ħajti ma tantx kellha jiem. Madankollu bqajt nikber, nisforza, Forsi fl-aħħar nispiċċa bis-sliem.
Ħin bla waqt insib ruħi meħuda, Jien u ħuti flimkien imqabbdin, gewwa dar, dar sabiħa u kbira, Kollha riħa ta’ ward, ġiżimin.
ġejna mqiegħda fuq mejda lewn abjad, Ta’ l-irħam, tixraq biss lil Sultan, Ftit fil-għoli jien rajt ġo maxtura, Tfajjel ċkejken, simpatku, daħkan.
U x’kien hemm f’dan il-bini tal-għaġeb! Kemm teżori prezzjużi hemm rajt! Kemm xmux żgħar kollha jiddu madwari, W bellus aħmar imdendel mal-hajt.
Irranġawna sakemm tawna sura, Ta’ sħab fidda, bid-deheb imtektin, Eżatt f’nofsna ‘l-Bambin imbagħad qiegħdu, B’siequ msallba, b’idejh miftuħin.
F’din il-hajja qattajna ftit ġranet, zmien li fih ma ngħidx kemm ħadt pjaċir, Rajt bnedmin ġejja w sejra ferħana, Sa rajt ‘l-Anġli ħelwin t’Alla l-kbir.
U xi ħlewwa ta’ kant smajt madwari! Kant li ħsibtu kien ġej mis-smewwiet, Glorja ‘l Alla fil-firxa tas-sema, Għaliex twieled ir-Re tar-rejiet.
Kien hemm riħa li daħlet ġo ruħna, Riħa ħelwa li ġiet minn duħħan, Duħħan abjad magħmul għal tapposta Biex ġieh jagħtu lil Kristu Sultan.
Sebaħ jum li dil-hajja ntemmet, ‘L dak it-tfajjel ħaduh u qafluh, ġewwa n-niċċa magħmula apposta, Sabiex hemm qima jibqgħu jagħtuh.
Imbagħad lilna, jaħasra, qabduna U waddbuna f’barmil tal-iskart, Wara ftit sibna ruħna ġo miżbla, Qegħdin ninxfu, mitluqa ma’ l-art.
Waqt li kont qed immut hemm mirfusa Ħsiebi ngħaqad għal ftit mal-Mulej Għidtlu,”Grazzi, Sinjur, li nqdejt bija, Għalkemm jiena ma niswa għal xej’”
Victor Rizzo Mahoney
|